Музей «Выратаваныя мастацкія каштоўнасці»
Філіял «Выратаваныя мастацкія каштоўнасці» адкрыты 4 лютага 1989 года. Гэта адзіны ў Беларусі музей, экспазіцыя якога складаецца з твораў мастацтва і прадметаў антыкварыяту, канфіскаваных мытнікамі пры спробе незаконнага вывазу іх за мяжу. 19 лютага 2016 года адкрылася новая экспазіцыя музея, у 10 залах якой прадстаўлена каля 400 музейных прадметаў.
Унікальныя экспанаты распавядаюць аб дзейнасці Брэсцкай мытні па прадухіленні кантрабанды культурных каштоўнасцяў. Самы шырокі раздзел экспазіцыі музея ўяўляе калекцыю рускага іканапісу ХVI — пачатку ХХ стагоддзя. У асобных залах экспануюцца іконы ў срэбных акладах, створаных у вядучых ювелірных цэнтрах Расіі, калекцыя рускага меднага мастацкага ліцця. Свецкае ювелірнае мастацтва прадстаўлена вырабамі сусветна вядомых фірмаў Фабержэ, Аўчыннікава, Хлебнікава і іншых. У раздзеле мастацтва краін Усходу можна ўбачыць творы майстроў Японіі, Кітая, Сярэдняй Азіі. Еўрапейскае дэкаратыўна-прыкладное мастацтва ХVIII — пачатку ХХ стагоддзя прадстаўлена антыкварнай мэбляй, вырабамі з бронзы і фарфору. У калекцыі жывапісу пераважаюць творы пейзажнага і партрэтнага жанраў, асобная зала прысвечана мастацтву графікі. У выставачнай зале музея рэгулярна праводзяцца вернісажы, творчыя сустрэчы з мастакамі, літаратурна-музычныя вечары, канцэрты камернай музыкі, майстар-класы і музейна-педагагічныя заняткі.